Bhojpuria.com

कहल जाला कि पूत के पांव पालना में ही लउक जाला, आ अइसने कुछ हमनी के परिवार के सोशल नेटवर्क जय भोजपुरी डॉट कॉम का संगे भी हो रहल बा। अपना शुरुआत से मात्र तीन महीना के भीतर जय भोजपुरी डॉट कॉम दुनिया भर में भोजपुरियन खातिर सबसे प्रसिद्ध वेबसाइट बन गइल बाटे। दुनिया के 50 हजार पॉपुलर वेबसाइटन के लिस्ट में शामिल होखे के खातिर बड़-बड़ कंपनी लाखों रुपया खर्चा करेली सन, ऊ मुकाम हमनी के वेबसाइट खाली तीन महीना में हासिल क लिहलस, ई देखला के बादो विश्वास नइखे होत।

आ एह बात के पुष्टि क रहल बाटे वेबसाइटन के टीआरपी (लोकप्रियता आ हिटस) मापे वाली अमेरिकन वेबसाइट अलेक्सा डॉट कॉम, जवन कि दुनिया भर में वेबसाइटन के रैंकिंग के सबसे प्रमाणिक संस्था मानल जाले। एकरा रैंकिंग में दुनिया के हर भाषा (अंग्रेजी समेत) के, आ हर तरह के वेबसाइट शामिल रहेली सन। आ एहिजा लगभग एक करोड वेबसाइटन के रैंक नियमित रुप से प्रकाशित कइल जाला। रउरा जय भोजपुरी डॉट कॉम आ भोजपुरिया डॉट कॉम के ताजा रैंकिंग नीचे दिहल लिंक पर क्लिक क के देख सकेनी।

http://www.alexa.com/siteinfo/jaibhojpuri.com
http://www.alexa.com/siteinfo/bhojpuria.com

पिछला चार साल से हमनी के भोजपुरिया डॉट कॉम एह रैंकिंग में लगातार भोजपुरी वेबसाइटन में पहिला स्थान पर बनल रहल बा, आ अब त हालत ई बा कि भोजपुरी के के कहो, हिन्दी के भी 2-4 गो बडहन वेबसाइटन के छोड के कवनो हमनी से आगे नइखे। बिहार, उत्तर प्रदेश, झारखंड या फिर भोजपुरी के नांव पर चले वाली पर कवनो वेबसाइट के रैंकिंग 3-4 लाख से कम नइखे, जबकि जय भोजपुरी डॉट कॉम के ग्लोबल रैंकिंग 40 हजार हवे, आ भोजपुरिया डॉट कॉम के 49 हजार।

देश के सर्वश्रेष्ठ कल्चरल वेबसाइट (2006) के अवार्ड का संगे देश-विदेश में कई गो आउर अवार्ड जीत चुकल भोजपुरिया डॉट कॉम खातिर एह ग्लोबल शीर्ष रैंकिंग से भी बढके बा हमनी के पाठकन के प्यार आ विश्वास। चाहें ऊ राज ठाकरे के विरोध होखे, या भोजपुरी नाम बेचे वालन के विरोध, या फिर फिल्म इंडस्ट्री से जुडल कवनो विवाद, रउरा लोगन के जवन अपार सहयोग हमनी के मिलल, ओकर कवनो तूलना नइखे कइल जा सकत। एहिजा हमनी का इहो बतावल चाहेब कि एह दूनो वेबसाइट के बाद जवन वेबसाइट तीसरा नम्बर पर चल रहल बाटे, उहो भोजपुरिया परिवार के ही हवे। गीत भोजपुरी नाम के ई वेबसाइट ऑनलाइन भोजपुरी गीतन के सबसे बडा स्त्रोत बाटे। ओकरा संगे-संगे साहित्य के बढावा देवे खातिर भोजपुरी दर्पण नाम से एगो वेबसाइट के भी आगाज भइल बा। एह दूनो वेबसाइट के प्रबंधन एगो होनहार युवा शरत निखिल के हाथ में बाटे।

आज एह मुकाम पर हमनी का धन्यवाद दिहल चाहेब, अपना सब विजिटर लोग के, शुभचिंतक लोग के, आ पूरा भर देश के मीडिया के, जिनका बगैर शायद ई संभव ना रहे। पिछला लगभग पाँच साल से चल रहल एह सफर में, हमनी का समाज के प्रति अपना जिम्मेदारी पर हमेशा खरा उतरे के कोशिस कइले बानी जा, आ हमनी का रउरा के विश्वास दियावल चाहेब कि रउरा लोगन के सहयोग से, झूठ आ अन्याय के खिलाफ ई अभियान आगे भी जारी रही। एहिजा इहो बतावल जरुरी बा कि हमनी का हमेशा निष्पक्ष भाव से सच के साथ देले बानी जा, आ शायद इहे हमनी के सफलता के मूलमंत्र हवे।

अब, जबकि हमनी के ग्रुप के वेबसाइट पहिला तीनो स्थान पर बाडी सन, हमनी का इंतजार में बानी जा कुछ अइसन लोगन के, जे भोजपुरिया डॉट कॉम के भविष्य के साथ आपन भविष्य देख रहल होखे। अगर अन्याय के खिलाफ वेबसाइट से लेके सडक तक लडे के जज्बा होखे, सोच सकारात्मक होखे, आ अपना नाम से ज्यादा अपना भोजपुरी माई के सम्मान प्यारा हो, त रउरो एह टीम के हिस्सा बन सकेनी। आईं, भोजपुरी खातिर कुछ कइल जाव...